Gaammo zoone mala 2017 bajeten minthethiza muruutay xaafettidaysa saroteththanne woppateththa kaaleththoy qonc’issides.

Gaammo zoone poolise kaaleththoy 2017 bajete laytha halcho polo mixxi xeelonne 2018 bajete laytha halcho yuushon duulatay Arba Minc’e kataman oothettides.

‎Arba Minc’e : Galunda 15/12/2017 M.L (Gaammo Telebizhine)

‎Gaammo zoone ayso aawa gisha Daanna Phawuloosa Derejjey gida mala poolise oothoy saroteththanne heera woppateththa naagisoppe aadhidi dere dichchas imishe diza maadoy dhoqqako gida.

‎ Kumeththara saroteththa naagisoy poolise ootho giidi aggonta ubba dereteththayka ba aawateththa kezana mala kiita aaththida.

‎Gaammo zoone saroteththanne woppateththa kaaleththo kaappo Daanna Qafire Qafey banta baggara kuuyettida bajete laythan Gaammo zoone mala xaafettida muruutati mintheththiza gididaysa qonc’issida.

‎Gujjidika, muruutay xaafetana danda’ida gaasoy wuda immidi oothoninne issippeteththa minthon gididaysa Daanna Qafey haasayida.

‎Gaammo zoone poolise Takitike mooro pilgeththa yara kaappo Komandere Tekilu Erettay gida mala aadhdhida bajete laythan seerappe kare zal’e baggara 92 miiloone biran heregettiza miishshata oykidi kawos gelthidaysa qonc’issida.

‎Hara baggara eqotata xaphisanaas dereteththappe 21 miilooneppe bolla gidiza demisha shiishidaysaka malatida.

‎Gujjidika laytha giddon seerappe kare gidida dumma dumma wudata bolla hasheteththan oothon lo’o polo xaafetana mala oothidaysa qonc’issida.

‎Haysappeka gujon salo gufantho moorota guusayka seerappe karera asata yuushonne seerappe kare zal’eta teqo baggara mino qaaxoti beettidaysa malattida.

‎Duulatan beettida maado inispekitere Bulcha Bukkayinne Kaalo Komandere Mergiya Merkiney banta baggara dereteththa tamarsoninne akeekison mooron gelonta mala oothishe gam’idaysa yootida.

‎Gujjidika, yiza bajete laythan kumeththa saroteththa medhanaas halchidi oothishe doos gida.

‎Duulatan iriportey paateththan shiiqidaysa gidishin wuday gelthizaytara zoretethan mino miyeta minthanaasinne shugo miyeta qasse giigisanaas eenoteththan gakkida.

‎Kaallidka dichcha demida poolisetas maarage mayzoy, maado imidaytasinne lo’o polo xaafissida enc’eretas marka warqatayinne wanc’a woytoy imettides.

‎Wursethan kumeththa saroteththa medhon saro heera xaafissida enc’eretasikka dumma woytoy imettides.

‎Duulatan Gaammo zoone aysa aawa gisha Daanna Phawuloosa Derejje , Gaammo zoone saroteththanne woppateththa kaaleththo Qafire Qafe gujjidi Gaammo zoonen diza ec’eretappe kezida wuday gelthizayti beettida.